तरंदळे येथे व्यसनमुक्तीचा संदेश; विद्यार्थ्यांना मार्गदर्शन

तरंदळे, ता. कणकवली, जि. सिंधुदुर्ग : विद्यार्थ्यांनी व्यसनांपासून दूर राहून शिक्षण, व्यायाम आणि कौशल्य विकासावर भर द्यावा, असे आवाहन सरपंच सुशील कदम यांनी केले. स्वातंत्र्य दिनाच्या कार्यक्रमाचे औचित्य साधून ग्रामपंचायत तरंदळे, तरंदळे जिल्हा परिषद शाळा आणि संबंधित पदाधिकाऱ्यांच्या संयुक्त विद्यमाने विद्यार्थ्यांसाठी मार्गदर्शनपर कार्यक्रमाचे आयोजन करण्यात आले.

कार्यक्रमाची सुरुवात ग्रामपंचायत कार्यालयासमोर सरपंच सुशील कदम यांच्या हस्ते ध्वजारोहणाने झाली. यावेळी शाळेतील विविध शैक्षणिक उपक्रमांमध्ये उल्लेखनीय कामगिरी करणाऱ्या विद्यार्थ्यांचा तसेच गुणवंत विद्यार्थ्यांचा गौरव करण्यात आला.

मार्गदर्शन करताना सरपंच सुशील कदम यांनी मोबाईल, दारू, तंबाखू व गुटखा यांसारख्या व्यसनांपासून विद्यार्थ्यांनी व युवकांनी दूर राहावे, असे आवाहन केले. व्यसनामुळे आरोग्य, शिक्षण आणि भविष्यातील प्रगतीवर होणाऱ्या दुष्परिणामांची माहिती देत विद्यार्थ्यांनी अभ्यासासोबतच व्यायाम आणि विविध कौशल्यांच्या विकासाकडे लक्ष द्यावे, असे त्यांनी सांगितले.

यावेळी ग्रामपंचायत अधिकारी, पदाधिकारी, शिक्षक, अंगणवाडी सेविका, विद्यार्थी आणि ग्रामस्थ उपस्थित होते. विद्यार्थ्यांमध्ये व्यसनमुक्तीबाबत जनजागृती निर्माण करण्यासाठी घेण्यात आलेला हा उपक्रम ग्रामपंचायतीच्या सामाजिक बांधिलकीचा सकारात्मक उपक्रम ठरला.

“व्यसनांच्या विळख्यात अडकू नका; शिक्षण, आरोग्य आणि कौशल्याच्या माध्यमातून उज्ज्वल भविष्य घडवा,” असा प्रेरणादायी संदेश या कार्यक्रमातून विद्यार्थ्यांना देण्यात आला.